A Olimpíada da Enerxía concíbese coma un proxecto de divulgación científica que ten como obxectivo principal ampliar o coñecemento e a comprensión da ciencia e tecnoloxía, achegando as disciplinas STEM relacionadas co sector enerxético (recursos enerxéticos, xeración e distribución de enerxía, aproveitamento eficiente) a alumnado preuniversitario (4º ESO, Bacharelato e Ciclos formativos de FP) da comunidade autónoma galega.
Preténdese non só incrementar os coñecementos e habilidades do alumnado nos ámbitos anteriormente mencionados, senón tamén espertar curiosidade e interese sobre os mesmos e informar e formar sobre a relevancia que ten o sector enerxético na calidade de vida das persoas.
Como obxectivo secundario exponse combater a desinformación no ámbito da ciencia e a tecnoloxía, dado que se identifica un descoñecemento importante sobre o papel que ten o sector enerxético na sociedade e as súas implicacións ambientais, sociais e económicas.
A Olimpíada da Enerxía é un proxecto financiado no marco da convocatoria de axudas para o fomento de cultura científica, tecnolóxica e de innovación do 2023 da FECYT (Ministerio de Ciencia e innovación)
Que é diferente nesta Olimpíada?
Esta Olimpíada pivota sobre dúas actividades principais:
1. Formar o colectivo de interese
A primeira actividade ten como obxectivo formar ao colectivo de interese (alumnado de 4º de ESO, Bacharelato e Ciclos Superiores de FP) nas claves que permiten comprender o sector enerxético.
Para iso elaborarase e porase a disposición do profesorado dos centros educativos recursos didácticos específicos sobre o sector enerxético, entendido como un ámbito multidisciplinar que se alimenta de ciencias básicas ben coñecidas polo alumnado. Traballaranse contidos de materias STEM do seu currículo, como Física, Matemáticas, Química e Tecnoloxía, xunto con outros contidos de carácter interdisciplinar, como Economía e Medio ambiente. Traballaranse tamén habilidades transversais, como as relacionadas co desenvolvemento do pensamento crítico, a oratoria, o traballo en equipo e a divulgación científica.
Este é posiblemente o elemento diferenciador respecto a outros eventos similares: pór a disposición do profesorado recursos didácticos e ferramentas que poida usar na aula para adquirir coñecementos relacionados co sector enerxético. Os recursos didácticos son de diferente tipo (unidades didácticas, boletíns de exercicios/problemas, prácticas instrumentais, vídeos, recursos de gamificación, etc.…) e enmárcanse nas seguintes liñas temáticas:
- Enerxía, Sociedade e Clima
- Recursos para a produción de enerxía eléctrica
- Recursos enerxéticos para a xeración de enerxía térmica
- Economía circular e eficiencia enerxética
- Muller e enerxía
Durante o período de traballo nos centros estes contarán co apoio e asesoramento do profesorado da universidade durante o período de formación nos centros.
2. Avaliar os coñecementos e habilidades
Unha vez superado este período formativo nos centros educativos a segunda actividade é a avaliación de coñecementos e habilidades en relación ao sector enerxético. Isto materialízase na realización dun conxunto de probas de carácter teórico e práctico que se describen en epígrafes posteriores.
Durante o período de traballo nos centros estes contarán co apoio e asesoramento do profesorado da universidade durante o período de formación nos centros.