Bases da Olimpíada da Enerxía

> Participación

Poderá participar na I Olimpíada da Enerxía alumnado da Comunidade Autónoma de Galicia que durante o curso 2024-2025, estea matriculado en 4º de ESO, Bacharelato ou Ciclos Superiores de FP das familias profesionais: “Enerxía e auga”, “Química”, “Electricidade e electrónica” e “Seguridade e medio ambiente.

En canto á participación por centro establécense 2 categorías:

• Categoría I. Centros de ESO e/ou Bacharelato
• Categoría II. Centros de Ciclos Formativos Superiores de Formación Profesional

Queda a criterio de cada centro educativo seleccionar o alumnado que participa nas diferentes probas, a condición de que estea matriculado no centro nalgún dos niveis educativos indicados previamente. En calquera caso, atenderanse ás seguintes regras:

• No caso das probas por equipo o número mínimo é 3 persoas/equipo.
• O número máximo de participantes por centro que poden asistir ás probas que se celebran presencialmente o día da Xornada da Olimpíada é 6.

As condicións relativas ao número de participantes poderán incrementarse en función da capacidade das instalacións da Escola de Enxeñaría de Minas e Enerxía e comunicarase coa debida antelación aos centros educativos.

> Probas

A competición inclúe diferentes probas: de carácter individual e por equipos, obrigatorias e optativas. Preséntase a continuación a información básica de cada unha das probas:

Proba 1. Proba individual teórica. Exame individual de preguntas tipo test e/ou de resposta curta, que pode incluír a resolución de exercicios de problemas sinxelos. Esta proba realízase presencialmente na Xornada da Olimpíada.

 

Proba 2. Proba práctica de equipo. Consiste na automatización e programación dun sistema de placa solar fotovoltaica, con axuda dun kit Esta actividade está concibida para que o alumnado traballe previamente no centro educativo, mentres que o ensamblado, programación final do sistema e a demostración do seu funcionamento lévese a cabo na Xornada da Olimpíada.

Proba 3. Proba de divulgación científica de equipo. Esta actividade está concibida para que o alumnado traballe previamente no centro educativo sobre un tema específico, de forma que o día da Xornada da Olimpíada terá que explicalo, nun tempo limitado e cos recursos que prepare previamente, a unha persoa ou grupo de persoas alleas ao ámbito do sector enerxético (público non especializado)

Proba 4. FAKE NEWS. Cada equipo recibirá unha noticia ou titular de prensa e deberá valorar e xustificar se se trata dunha aseveración certa ou falsa. Neste caso, a proba tamén está pensada para que cada equipo traballe no centro sobre a noticia e elabore un póster co resultado. Os pósteres recibidos formarán parte dunha exposición que estará dispoñible o día da Xornada da Olimpíada.

Proba 5. Debate. Trátase de defender e argumentar unha decisión sobre un problema/tema proposto.

 

Proba 6. Mulleres Enerxéticas. O obxectivo desta proba é pór en valor o papel das mulleres no sector enerxético. Trátase de que o alumnado participante, por equipos, elabore un conxunto de fichas con estrutura, formato e extensión determinados, sobre o papel e/ou contribución das mulleres no sector enerxético. Esta proba materialízase na entrega das fichas, que se exporán impresas na Xornada da Olimpíada.

En cando ao carácter das probas, ao obxecto de que o centro poida planificar e organizar a participación no evento atenderanse ás seguintes condicións:

> Inscrición

A inscrición na Olimpíada realizarase en dúas fases:

• Fase 1. Inscrición dos centros educativos.
  En primeiro termo realizarase a inscrición dos centros educativos, trasladando nesta o interese formal por participar na Olimpíada. Esta inscrición realizarase ao longo do mes de novembro.

• Fase 2: selección do alumnado participante.
  A selección do alumnado participante queda a criterio do centro educativo. A inscrición formal do alumnado na Olimpíada realizarase ao longo do mes de marzo

> Avaliación e puntuación

As probas de equipo serán avaliadas por tribunais de avaliación, formados por profesorado da Universidade de Vigo, en base ás rúbricas establecidas para cada proba. Estas faranse públicas antes do comezo do traballo nos centros educativos (xaneiro 2025). As decisións dos tribunais de avaliación son inapelables.

A continuación indícanse as regras xerais de puntuación:

Puntuación para premios por proba

A proba tipo test consistirá nun exame tipo test teórico-práctico (máximo 50 preguntas de resposta única). A puntuación máxima da proba son 25 puntos.

No caso das probas por equipo (probas 2 a 6) a puntuación outorgarase por equipo. A puntuación máxima por proba de equipo son 25 puntos.

Puntuación para premios por centro

A cada centro asignaráselle unha puntuación, calculada do seguinte modo:

Puntuación por centro: máxima puntuación alcanzada polo alumnado do centro educativo na proba 1 + puntuación outorgada na proba 6 + puntuación outorgada nas dúas probas optativas. A puntuación máxima por centro será 100 puntos.

No caso de que o centro educativo se presente a máis de dúas probas optativas seleccionaranse as dúas puntuacións máis altas obtidas no conxunto das probas optativas.

Puntuación para premios alumnas

Puntuación para premios alumnas: sumaranse todas as puntuacións outorgadas a cada alumna en todas as probas nas que participe, adxudicándose os premios en función das puntuacións máximas obtidas a cada alumna.

> Descarga as  Bases da Olimpíada

  Bases da Olimpíada Enerxía (pdf en Galego)

  Bases da Olimpíada Enerxía (pdf en Español)