O martes 17 de decembro Elena Alonso, coordinadora do proxecto “I Olimpíada da Enerxía”, presentou o novo proxecto de divulgación científica da Escola de Enexeñaría de Minas e Enerxía, a través dun video que se está a difundir na web do proxecto así como nas redes sociais e outras plataformas de distribución de contido.
Aquí vos deixamos o contido da súa exposición:
A Olimpíada da Enerxía é un proxecto de divulgación científica organizado pola Escola de Enxeñaría de Minas e Enerxía da Universidade de Vigo, co apoio e financiamento da Fundación Española para a Ciencia e a Tecnoloxía.
Neste vídeo vou tratar de responder as principais cuestións: Por que organizamos este evento e que obxectivos temos? Que diferenza a estas olimpíadas doutras? Quen pode participar?, Como e cando se vai a desenvolver?.
A Olimpíada da Enerxía ten como obxectivo principal contribuír ao coñecemento do sector enerxético, prestando especial atención a identificar a importancia que ten no noso día a día, na vida das persoas, unha subministración segura, fiable, sustentable, de enerxía térmica e eléctrica. Ademais, pretendemos tamén espertar curiosidade e interese sobre o sector enerxético e combater a desinformación sobre o mesmo. É un sector do que diariamente hai noticias en prensa e RRSS e queremos contribuír para que as persoas que participen no proxecto comprendan a información e mesmo poidan identificar datos ou informacións e aseveracións erróneas.
Quen pode participar?
Unha olimpíada é unha competición e neste caso a competición está concibida para alumnado de Galicia de 4º ESO, Bacharelato e ciclos formativos de FP de familias profesionais relacionadas co sector enerxético. Este alumnado pode participar previa inscrición do centro na Olimpíada e o centro selecciona ao alumnado que o representa nas diferentes probas.
Pero, que diferencia esta olimpíada doutras?
A diferenza fundamental é que a olimpíada non é soamente a competición. Nesta olimpíada, ademais, queremos contribuír á formación para a realización das probas. Así que a Olimpíada pivota sobre dúas actividades:
- A primeira actividade, que ten como obxectivo contribuír á formación do sector enerxético, consiste en elaborar e pór a disposición do profesorado dos centros participantes recursos didácticos específicos, para que poidan ser empregados na aula. Estes recursos didácticos están clasificados por liñas temáticas, que son: (i) enerxía, sociedade e clima, (ii) enerxía térmica, (iii) enerxía eléctrica, (iv) economía circular e eficiencia enerxética e (v) mulleres enerxéticas. Son de acceso público na web do proxecto, no apartado “RECURSOS”.
- A segunda actividade, que ten como obxectivo avaliar o coñecemento sobre o sector enerxético, consiste na competición, que inclúe un conxunto de 6 probas. Das 6 probas hai dúas obrigatorias para todos os centros educativos e outras dúas optativas, a escoller entre un conxunto de catro. A información detallada das probas figura no apartado “PROBAS” da web do proxecto.
Vou trasladar a información básica. As dúas probas obrigatorias son unha proba individual tipo test e unha proba de equipo que chamamos “Mulleres Enerxéticas”. As catro probas optativas son Práctica Arduino, Divulgación Científica, Debate e FAKE NEWS. O centro selecciona un mínimo de 2 probas entre esas 4 para realizar.
As probas son as seguintes:
- Proba 1. Proba individual teórica. Exame individual de preguntas tipo test ou de resposta curta, que pode incluír a resolución de exercicios de problemas sinxelos. Esta proba realízase presencialmente na Xornada da Olimpíada e é obrigatoria.
- Proba 2. Proba práctica de equipo. Consiste na automatización e programación dun sistema de placa solar fotovoltaica, con axuda dun kit Arduino. Esta actividade está concibida para que o alumnado traballe previamente no centro educativo, mentres que o ensamblado, programación final do sistema e a demostración do seu funcionamento leve a cabo na Xornada da Olimpíada.
- Proba 3. Proba de divulgación científica de equipo. Neste caso proporcionaremos a cada equipo un tema, de forma que o día da Xornada da Olimpíada terá que explicalo, mediante os recursos e material que preparase previamente, a público non especializado.
- Proba 4. FAKE NEWS (equipo). Cada equipo recibirá unha noticia ou titular de prensa e deberá xustificar se se trata dunha aseveración certa ou falsa.
Neste caso, a proba tamén está pensada para que cada equipo traballe no centro sobre a noticia e elabore un póster co resultado. Os pósteres recibidos formarán parte dunha exposición que estará dispoñible o día da Xornada da Olimpíada.
-
Proba 5. Debate. Trátase de defender e argumentar unha decisión sobre un problema/tema proposto.
-
Proba 6. Mulleres Enerxéticas. Obrigatoria. O obxectivo desta proba é pór en valor o papel das mulleres no sector enerxético. Trátase de que o alumnado participante, por equipos, elabore un conxunto de fichas con estrutura, formato e extensión determinados, sobre o papel e/ou contribución das mulleres no sector enerxético. Esta proba materialízase na entrega das fichas, que se exporán impresas na Xornada da Olimpíada.
E agora imos a outra cousa importante: os premios.
Concederanse premios aos centros educativos, premios por probas e uns premios especiais ás mellores alumnas.
Para finalizar todo o alumnado participante na Olimpíada da Enerxía recibirá diploma e medalla de participación e cun pequeno agasallo da Escola de Enxeñaría de Minas e Enerxía.
Nesta web do proxecto está dispoñible toda a información e recursos didácticos, xunto cos nosos datos de contacto. Estamos á vosa disposición para liquidar as dúbidas que teñades.
Moitísimas grazas por chegar até aquí e benvidos e benvidas, enerxéticos e enerxéticas de Galicia!